؛؛مدخل؛؛
ودعت أنا ذيك المهاة الرزينه
والقـلب تـوه مـن هـوى سـكرتـه فاق
على مهب الريح وزع حنينه
دام غربت عن حبنا شمس الأشواق
((العنا جاي))
أي والله أنه مابقى يالغلا راي
البعد قاسي والجفا محتويني
ماعاد ينفع تجبر النفس لرضاي
أمر ٍقضى به تصطفق راحتيني
حب ٍحكم دون المعاذير وأقفاي
لاتسأليني صدق لا تسأليني
طيفك يخاشرني على بيالة الشاي
وش حيلتي دام الطواري تجيني
لاشك ماهو ياغلا الروح مشهاي
بعدك... ولكن حظنا مبتليني
الحب رحله وأصعبه بالعنا جاي
عل الصبر في وحدتي يعتريني
أحيان أحس إني على الصد شراي
وأحيان أحسه بالخفا مقتفيني
والله بري من زلة الحب وأبراي
مير أنفلت حبل الوصل من يديني
ياشينها لا عاكست دون مشهاي
الياس واصل وأعظم الشوق فيني
عزف السعاده تغلبه عزفة الناي
عزاه ياقلب ٍمصيره حزيني
ياقلب هيد مابقى بالحشا راي
البعد يقتل مابقى من حنيني
؛؛خروج؛؛
لاتـعـذلـونــي والـنــقـا فــي جـبينه
الله عـليـم ولا قـفـل باب الأرزاق
ياخافقي خــل الجـروح الـدفـيـنـه
هـذي هـي الـدنـيا بها جمع وفراق