؛؛مدخل؛؛
أسمح وأجامل بالمعاذير لرضاك
...................وألا الصراحه لاهب الوجد عرقا
عرقا على قلبي من البعد ماجاك
....................والعين ماشاحت على كل طرقا
((قلب رجال))
الليل ماسر القلوب الجريحه
ظلامه أسرف بالحقايق والآمال
دام الأماني للهواوي شحيحه
والله ليبطي في رجاها ولانال
أتبعت نفسي مافهمت النصيحه
أن الهوى يغلب على كل الأحوال
أسرجت خيلي للفجوج الفسيحه
لكدتها والحب بالجوف يجتال
أشبعتها من كل همسه صريحه
ولاشبهرت في ناظره خطو الأزوال
أزوال تحفر للعلاقه ضريحه
يالله دخيلك تالي الحب قتال
ليه أوله ريح الخزاما وشيحه
اللي إليا هب الهوا غصنها مال
وتميل معها طفلة ٍمستريحه
في حضن رجال ماهو بأي رجال
يدرا عليها عن دروب الفضيحه
قلبه حضنها بيت وأشواقه ظلال
والنفس لو تخطي...عليها سميحه
ماتستمع لهروج حاسد وعذال
الحب ساري والمبادي صحيحه
والعشق عاقبني عليه أشهب اللال
أطرد سرابه ماحسبت لمطيحه
حبه زهابي والوصل قمة الجال
وألا الظما عندي حنانه نطيحه
ياكيف أبظما والرجا حي مازال
الحب باقي والليالي تزيحه
لاصار طاري قطع الأشواق يختال
شوق اللقا باقي والأريا طريحه
لاصار ماللنفس في شد الأحبال
لكن على الله يالحظوظ الشحيحه
تكفين لاتمسين في قلب رجال
؛؛خروج؛؛
وألا الخفوق معذبه طرد لاماك.................
يبرد بوصلك لا أشعل الصد حرقا
الله ييسر لي على حظ يمناك.................
دام الاماني في هقاويك غرقا